Kapingaz Blog

Thursday, April 27, 2017

CHETI CHA KUZALIWA KINAWEZESHA MTANZANIA KUPATA HAKI ZA MSINGI-PROF KABUDI


US3
Waziri wa Katiba na Sheria Prof. Palamagamba  Kabudi amesemacheti cha kuzaliwa kunamuwezesha mtoto/mtanzania kupata haki za msingi kama raia.
Prof  Kabudi amesema hayo mjini  Dodoma wakati akifungua semina ya wadau kujadili mapitio ya sheria zinazohusiana na usajili wa matukio muhimu ya binadamu nchini.
Amesema ni muhimu kuimarisha harakati za kukuza mwamko wa usajili wa watoto na watanzania kwa ujumla wanapaswa kusajiliwa na kupata vyeti kwani kuwa na vyeti hivyo kutawawezesha kupoata haki zao za msingi .
Amezitaja haki hizo kuwa ni pamoja na kuwa na jina,kupata kazi, kutambulika kama raia, na kuzuia watoto chini ya miaka 18 kuingizwa katika vita, ajira za utroto na hata kushtakiwa kwa makosa ya jinai na kuwekwa rumande na watu wazima.
Prof Kabudi alichukua nafasi hiyo kuihakikisha timu hiyo kwamba atahakikisha sheria hiyo ya usajili wa vizazi, vifo na talaka inafanyiwa marekebisho haraka ili ziweze kwenda na wakati uliopo sasa na hivyo kukuza usajili wa watanzania .
‘Nitahakikisha sheria hii inafanyiowa marekebisho haraka, kwani kuirekebisha sheria hii kutaifanya iendane na wakati na kufanya usajili wa watanzania kuongezeka, hatuna budi kuongeza bidii katika kazi hii ili watanzania wote waweze kusajiliwa na kuwa na vyeti vya kuzaliwa,” alisema Prof. Kabudi.
Awali akizungumza kabla ya kumkaribisha Waziri Kabudi Mweyekiti wa Tume ya Kurekebisha Sheria nchini Jaji Aloysis Mujuluzi tume yake iliendeesha utafiti juu ya sheria hiyo ya usajili katika mikoa 13 nchini na kuunganisha na tafiti za sheria mbalimbali ili kuhakikisha maboresho ya sheria hiyo yanazingatia maoni ya wadau mbalimbali nchini.
Alisema wanaifanya kazi hiyo kwa moyo mmoja na watakapoikamilisha tu watamkabidhi Waziri Kabudi ili nae atoe maoni yake kama mdau ili kuweza kuwa na sheria mpya itakayokidhi mahitaji ya wakati uliopo na wakati ujao.
Alisema katika tafiti yao wamegundua kuwa mfumo wa usajili wa raia nchini haujakaa vizuri kwani  mifumo hiyo haiuzungumzi lugha moja na hivyo kuwachanganya watanzania. Aliitaja mifumo hiyo kuwa ni Vitambulisho vya Taifa, kadi ya mpiga kura , hati ya u
Kusafiria na cheti cha kuzaliwa
Alisema umefika wakati sasa kwa mifumo hiyo kuzungumza lugha moja na kuongeza kuwa mifumo yote hiyo ilitakiwa itegemee chetio cha kuzaliwa cha mtu na ndipo waendelee na utaratibu wake.
Alisema kutokana na hali hiyo ndio maana watanzania wachache wapatao asilimia 13.4 tu ndio wenye vyeti vya kuzaliwa 

RITA YAMPA TUZO DKT. HARISSON MWAKYEMBE


mwakay2
Waziri wa Katiba na Sheria Mh. Profesa Paramagamba Kabudi akimkabidhi tuzo ya heshima Waziri wa Habari, Sanaa Utamaduni na Michezo Mh. Dk. Harisson Mwakyembe kutoka  umempa tuzo ya heshima aliyekuwa Waziri wa Katiba na Sheria mhe. Dkt Harrison  Mwakyembe kutambua mchango wake katika kuboresha hali ya usajili wa matukio muhimu ya binadamu nchini Kutoka Wakala wa Usajili, Ufilisi na Udhamini nchini- RITA kushoto ni Naibu Katibu Mkuu wa Wizara ya Katiba na Sgeria Ndugu Amon Anastaz Mpanju.
mwaky1
Aliyekuwa Waziri wa Katiba na Sheria mhe. Dkt Harrison  Mwakyembe akionyesha tuzo ya heshima aliyokabidhiwa kutoka RITA mara baada ya kukabidhiwa kushoto ni Naibu Katibu Mkuu wa Wizara ya Katiba na Sgeria Ndugu Amon Anastaz Mpanju.
………………………………………………………………………………………..
Wakala wa Usajili, Ufilisi na Udhamini nchini- RITA umempa tuzo ya heshima aliyekuwa Waziri wa Katiba na Sheria mhe. Dkt Harrison  Mwakyembe kutambua mchango wake katika kuboresha hali ya usajili wa matukio muhimu ya binadamu nchini.
Tuzo hiyo ya RITA alikabidhiwa Dkt Mwakyembe na Waziri wa Katiba na Sheria Prof. Palamagamba  Kabudi katika hafla iliyofanyika katika Ofisi za Wizara mjini Dodoma
Akimkabidhi tuzo hiyo Prof. Kabudi alimpongeza DKT Mwakyembe kwa jinsi alivyojitoa na kuhakikisha hali ya usajili inaboreka na hivyo kuinua mwamko wa wananchi na kuona umuhimu wa kujisajili na kuwa na cheti cha kuzaliwa.
Aliwataka watumishi wa RITA na wa Wizara waliokuwepo katika hafla hiyo kuiga moyo wa Dkty Mwakyembe wa kujitoa ili kuhakikisha kazi yake inakuwa na mafanikio.
Akizungumza baada ya kupokea Tuzo hiyo Dkt .Mwakyembe aliwaahidi RITA na Wizara kwa ujumla kuwa ataendelea kuwaunga mkono kupitia Wizara yake mpya ya Habari na kuwataka waendeleze jitihada zao katika usajili ili kuwafanya Watanzania wote wapate vyeti vya kuzaliwa.
“Sina neno  kubwa la kuwaambia zaidi ya asante, asanteni sana,niwaahidi kwamba nitaendelea kuwaunga mkono huko nilikoenda, nanyi lazima muendeleze kazi ya kuhamasisha usajili kwa nguvu zenu zote, mjue kwamba mna kazi kubwa mbele yenu na ni lazima ifanikiwe”, alisema Dkt Mwakyembe.
Alisema kazi ya usajili wa matukio muhimu ya binadamu ina umuhimu mkubwa kwa jamii yetu, hii ni kwa ajili ya usalama, uchumi , kijamii na kwa ajili ya maendeleo ya nchi na hivyo ni jukumu lenu kuhakikisha watanzania wote wanasajiliwa ili tuweze kuilinda vyema Tanzania yetu.  Kila Mtanzania lazima asajiliwe, lazima ajulikane, hili litasaidia nchi kuhakikisha mgawanyo wa rasilimali zake unakuwa ipasavyo”, alisisitiza Dkt Mwakyembe.

TAARIFA KUTOKA JESHI LA POLISI MKOANI MWANZA


SOUPO
  • WATU WA NNE WANASHIKILIWA NA JESHI LA POLISI KWA TUHUMA ZA KUHUSIKA KATIKA MAUAJI WILAYANI SENGEREMA.


  • MTU MMOJA ANASHIKILIWA NA JESHI LA POLISI KWA TUHUMA ZA KUMBAKA NA KUMPA UJAUZITO MJUKUU WAKE WILAYANI ILEMELA.

KWAMBA TAREHE 25.04.2017 MAJIRA YA SAA 13:40HRS KATIKA MTAA WA NYATUKALA WILAYA YA SENGEREMA MKOA WA MWANZA, WATU WA NNE WANASHIKILIWA NA JESHI LA POLISI KWA TUHUMA ZA KUHUSIKA KATIKA MAUAJI YA MTU MMOJA ALIYEFAHAMIKA KWA JINA LA SELFU AMRI @ MANUNGWA MIAKA 71, ALIYEUAWA KWA KUPIGWA NA KITU CHENYE NCHA KALI KICHWANI KWENYE PAJI LA USO NA KUFARIKI DUNIA PAPO HAPO NA WATU WANAODAIWA KUWA NI WANAFAMILIA, KITENDO AMBACHO NI KOSA LA JINAI.
INADAIWA KUWA MAREHEMU ALIKUWA AKIISHI MWENYEWE HAPO NYUMBANI KWAKE NA SIKU YA TAREHE TAJWA HAPO JUU BAADHI YA NDUGU WALIKUA WAKIPIGA SIMU YAKE BILA MAFANIKIO, KUTOKANA NA HALI HIYO NDUGU WALIKWENDA HADI  HAPO NYUMBANI KWAKE NA KUKUTA MILANGO IKIWA IMEFUNGWA LAKINI WALIPOCHUNGULIA DIRISHA LA CHUMBANI KWAKE WALIONA MWILI WAKE UKIWA UMELALALA KITANDANI NDIPO WALITOA TAARIFA POLISI.
ASKARI WALIFIKA HADI ENEO LA TUKIO NA KUFANYA TARATIBU ZA KUINGIA NDANI NA KUUKUTA MWILI WA  MAREHEMU KITANDANI HUKU UKIWA NA JERAHA KWENYE PAJI LA USO, AIDHA BAADA YA TARATIBU ZA ENEO LA TUKIO KUFANYIKA, ASKARI WALIUCHUKUA MWILI WA MAREHEMU NA KUUPELEKA HOSPITALI YA RUFAA YA BUGANDO KWA AJILI YA UCHUNGUZI ZAIDI WA KITAALAMU.
KUTOKANA NA KIFO HICHO ASKARI WALIFANYA UPELELEZI AMBAPO WALIFANIKIWA KUWAKAMATA WATU WA NNE WANAODAIWA KUSHIRIKI KWA NAMNA MOJA AU NYINGINE KATIKA KUFANIKISHA MAUAJI HAYO, KATI YAO WAPO BAADHI AMBAO WANAMAHUSIANO NA MAREHEMU LAKINI MAJINA TUNAYAHIFADHI KWA AJILI YA UCHUNGUZI, MWILI WA MAREHEMU TAYARI UMEKABIDHIWA KWA NDUGU WA MAREHEMU KWA AJILI YA MAZISHI, CHANZO CHA MAUAJI HAYO INADAIWA KUWA NI MGOGORO WA MIRATHI YA MALI ZA FAMILIA.
KAMANDA WA POLISI MKOA WA MWANZA NAIBU KAMISHINA WA POLISI AHMED MSANGI ANATOA WITO KWA WANANCHI WA MKOA WA MWANZA, AKIWAOMBA KUACHA TABIA YA KUJICHUKULIA SHERIA MKONONI KWANI NI KOSA LA JINAI BALI PINDI WANAPOKUWA KATIKA MIGOGORO YA AINA YEYOTE ILE NA WATU WENGINE WANATAKIWA KUTOA TAARIFA KWA VYOMBO HUSIKA KAMA VILE POLISI, MAHAKAMA AU MABARAZA YA ARDHI ILI HATUA ZA KISHERIA ZIWEZE KUFUATWA NA HAKI IWEZE KUPATIKANA.
 KATIKA TUKIO LA PILI,
MNAMO TAREHE 25.04.2017 MAJIRA YA SAA 20:15HRS USIKU KATIKA MTAA WA NYASAKA KATA YA NYASAKA WILAYA YA ILEMELA JIJI NA MKOA WA MWANZA, MTU ALIYEFAHAMIKA KWA JINA LA KALA MACHAGE MIAKA 66, MKAZI WA MTAA WA NYASAKA ANASHIKILIWA NA JESHI LA POLISI KWA TUHUMA ZA KUMBAKA NA KUMPA UJAUZITO MJUKUU WAKE JINA TUNALIHIFADHI MWENYE UMRI WA MIAKA 16, MWANAFUNZI WA KIDATO CHA PILI SHULE YA SEKONDARI NYASAKA, KITENDO AMBACHO NI KINYUME NA SHERIA.
INADAIWA KUWA MTUHUMIWA ALIKUWA AKIISHI  NA MJUKUU WAKE NYUMBANI KWAKE TOKEA MWAKA 2011 AKITOKEA MUSOMA VIJIJINI, INASEMEKANA KUWA KWA KIPINDI CHOTE HICHO MTUHUMIWA ALIKUA NA TABIA YA KUMFANYIA UKATILI MJUKUU WAKE KWA KUMWINGILIA KIMWILI WAKATI AMBAPO MKEWE HAYUPO HUKU AKIMTISHIA KUWA ENDAPO ATASEMA BASI ATAMUACHISHA SHULE KISHA ATAMRUDISHA KIJIJINI KWAO.
INASEMEKANA KUWA BINTI ALIENDELEA KUVUMILIA HALI HIYO BILA KUMWAMBIA MTU YEYOTE, NDIPO TAREHE TAJWA HAPO JUU  WAALIMU WALITILIA MASHAKA HALI YAKE YA KIAFYA NDIPO WALIMPELKA  HOSPITALI KWA AJILI YA UCHUNGUZI WA DAKTARI, NDIPO BAADA YA UCHUNGUZI BINTI ALIGUNDULIKA KUWA ANAUJAUZITO WA MIEZI MINNE NA ALIPOHOJIWA ALIDAIWA KUWA AMEPEWA NA BABU YAKE.
WAALIMU WALITOA TAARIFA POLISI KUHUSIANA NA TUKIO HILO, AMBAPO ASKARI WALIFANYA UFUATILIAJI WA HARAKA NA KUFANIKIWA KUMKAMATA MTUHUMIWA, MTUHUMIWA YUPO POLISI KWA MAHOJIANO PINDI UCHUNGUZI UKIKAMILIKA ATAFIKISHWA MAHAKAMANI ILI HATUA STAHIKI ZA KISHERIA ZIWEZE KUCHUKULIWA DHIDI YAKE.
KAMANDA WA POLISI MKOA WA MWANZA NAIBU KAMISHINA WA POLISI AHMED MSANGI ANATOA ONYO KWA BAADHI YA WATU WENYE TABIA YA KUWATAMANI KIMAPENZI WANAFUNZI KWA KUWARUBUNI AIDHA KWA FEDHA ZAO KUACHA TABIA HIYO MARA MOJA, PIA ANAWAOMBA WANANCHI KUTOA TAARIFA POLISI ZA WATU WENYE TABIA ZA AINA KAMA HII ILI WAWEZE KUKAMATWA NA KUFIKISHWA KATIKA VYOMBO VYA SHERIA.



IMETOLEWA NA:
DCP: AHMED MSANGI
KAMANDA WA POLISI (M) MWANZA

SPIKA AKUTANA NA BALOZI WA IRAN NCHINI TANZANIA


unnamed
Spika wa Bunge, Mhe. Job Ndugai (kushoto) akimsikiliza Spika Mstaafu, Mhe. Anne Makinda (kulia) ugeni uliomtembelea leo Ofisini kwake Mjini Dodoma.
IMGL7499
Spika wa Bunge, Mhe. Job Ndugai (kushoto)akipiga picha ya pamoja na Balozi wa Iran nchini Tanzania, Mhe. Mousa Farhang (Kulia) walipokutana leo katika kikao kilichofanyika ofisini kwake Mjini Dodoma
IMGL7496
Spika wa Bunge, Mhe. Job Ndugai (kushoto)akikabidhiwa  zawadi ya Busati toka kwa Balozi wa Iran nchini Tanzania, Mhe. Mousa Farhang (Kulia) walipokutana leo katika kikao kilichofanyika ofisini kwake Mjini Dodoma.
IMGL7478
Spika wa Bunge, Mhe. Job Ndugai (kushoto) akizungumza na ugeni kutoka Ubalozi wa Iran nchini Tanzania, katikati ni Balozi wa Iran nchini Tanzania, Mhe. Mousa Farhang katika kikao kilichofanyika leo Ofisini kwake Mjini Dodoma.

Waziri Masauni: Waliolipua Bomu Nyumba ya Kamishna wa Polisi Zanzibar ni Viongozi wa CUF

Naibu Waziri wa Mambo ya Ndani ya Nchi, Hamad Masauni amesema viongozi waandamizi wa chama cha wananchi (CUF) ndiyo walihusika na tukio la kulipua bomu katika nyumba ya Kamishna wa Jeshi la Polisi Zanzibar baada ya kufanyika uchaguzi mkuu

Mhe. Masauni alieleza hayo Bungeni Jijini Dodoma jana pindi alipokuwa akijibu swali la nyongeza kutoka kwa Mbunge wa Gandu kupitia tiketi ya (CUF) visiwani Pemba, Mhe. Othuman Omary Hajji alipotaka kujua kwanini mpaka leo hajizachukuliwa hatua stahiki kwa wafuasi wa CCM waliochoma nyumba za wanachama wa CUF huko visiwani Tumbatu, huku akidai serikali iliyopo madarakani siyo halali ni haramu kwa kuwa Jeshi la Polisi lilichangia kumuweka madarakani Dkt. Ali Mohamed Shein.

"Ni kweli baada ya uchaguzi mkuu baadhi ya vyama vya upinzani ikiwemo chake, viongozi walijitokeza kuhamasisha wananchi kufanya mambo yanayokiuka sheria za nchi yetu.

"Kuna matukio mbalimbali yalijitokeza ikiwemo kuchomwa moto nyumba, kuchoma mashamba, kurusha mabomu ikiwemo nyumba ya Kamishna wa Jeshi la Polisi wa Zanzibar ambayo kwa uchunguzi uliofanyika mpaka sasa, watu waliokamatwa kwa kuhusika urushaji bomu katika nyumba ya Kamishna ni viongozi waandamizi wa Chama cha Wananchi (CUF)". Alisema Masauni

Pamoja na hayo, Masauni alisema Jeshi la Polisi limeshakamilisha uchunguzi wake na jalada la mashtaka  lipo kwa DPP muda wowote kuanzia sasa litapandishwa Mahakamani ili sheria ichukuliwe.

Rais Magufuli kupokea taarifa vyeti feki LEO


RAIS John Magufuli leo anatarajiwa kupokea taarifa ya zoezi la uhakiki wa vyeti kwa watumishi wa umma katika Ukumbi wa Chimwaga mkoani Dodoma.

Taarifa iliyotolewa jana na Naibu Mkurugenzi wa Mawasiliano ya Rais katika Ikulu Ndogo ya Chamwino Dodoma, Jaffar Haniu ilisema taarifa hiyo itawasilishwa kwa Rais Magufuli na Waziri wa Nchi Ofisi ya Rais, Menejimenti ya Utumishi wa Umma na Utawala Bora, Angella Kairuki.

Zoezi la uhakiki wa vyeti kwa watumishi wa umma liliendeshwa na Serikali kuanzia Oktoba, 2016. 

Hivi karibuni wakati akifungua rasmi nyumba mpya za makazi ya wanafunzi wa Chuo Kikuu cha Dar es salaam, Rais Magufuli alisema anasubiri ripoti kuhusu watumishi wa umma wenye vyeti feki wapatao 9000.

“…Kwa hiyo mnaweza mkaona shida zilizopo katika nchi hii, huku wafanyakazi hewa karibu 19,000, wanafunzi hewa ni zaidi ya 56,000, kila mahali unapokwenda ni matatizo, lakini ni lazima niyatatue matatizo kwa sababu mlinichagua kwa ajili hiyo,” alisisitiza Rais katika hotuba yake hiyo.




Ray Kigosi afunguka Mambo Mazito kuhusu marehemu Kanumba Kuhusishwa na Uchawi na Freemason

Msanii wa filamu nchini Ray Kigosi amefunguka na kusema kuwa baadhi wa Watanzania ni wanafiki na wamekuwa wakikatisha tamaa watu katika mambo yao kutokana na unafiki wao.

Ray Kigosi amesema hayo kupitia ukurasa wake wa Instgram na kusema kutokana na unafiki huo wa baadhi ya watu ulimfanya mpaka marehemu Kanumba kuvunjwa moyo katika kazi yake.

==>Ray Kigosi ameandika;
1. Kanumba alipoanza kuona mwanga wa kufanikiwa bila kujali juhudi zake kuna watu walimuita Freemanson, Mara anatumia nguvu za Giza. that is to say films zake hazikuwa nzuri but ziliuza sababu ya nguvu za Freemanson na nguvu za giza!!

2. Kanumba alipoenda Big Brother alipondwa Sana na kuitwa bogus kwa Madai hajui kiingereza, Ni watanzania Hawa Hawa walibebea bango hili huku baadhi ya waandishi uchwara wakieneza ujinga huu bila kujali juhudi zake. But Leo wanamsifia hakuna Kama Kanumba!

3. Kuna wakati Kanumba alionekana wazi kuvunjwa moyo na kukatishwa tamaa kwa kuonekana juhudi zake si kitu. But Alisema maneno machache Kuwa mtanikumbuka kama si Leo basi Ni Kesho.
And alichosema kimetimia, wale wale waliokuwa wakisema Ni Freemanson bila hata kujali juhudi zake kwenye game Leo ndio kwa unafiki wanasema hakuna Kama Kanumba !….. HAO NDIO BINADAMU NA TABIA ZAO
Je Kanumba kaondoka na Bongo Movie yake ya Freemanson ? Kama wengine mnavyodhani industry Ni Mtu sio system !

4. Diamond Platnumz nae baada ya kuona Njia ya mafanikio kuna watanzania, wasanii wenzake na hata baadhi ya wanahabari wanasema Ni Freemanson, wengine wanaonyesha chuki ya wazi kwake. Wanasema Hana muziki mzuri, Mara Ni Kiki tu ambazo hata Kanumba alikuwa akiripotiwa magazetini na kina Wema.

Hawaoni juhudi na thamani ya Diamond sasa ! Hatuombi baya limpate Diamond ili kudhibitisha tabia na unafiki wa binadamu. But HAO NDIO BINADAMU siku zote hawana Jema unafiki ni sehemu ya Maisha.

5. kila siku Ni kuzua hii na kile, Mara ooh Diamond Ni mchawi, kasema mleteni huyo mganga wangu mkashindwa kumleta, akajitokeza mganga fake sijui na Madai juu Kuwa Diamond atashuka kimuziki kwa sababu ananipuuza niliyempa nyota, Diamond akasema sawa namtegemea Mungu. Miaka 4 sasa tangu yaliyoitwa ya mganga Diamond hashuki ndio anazidi kupaa. HAO NDIO BINADAMU kusema lolote Ni haki Yao.

Kazi za Kanumba sasa zinapewa thamani na ubora uliovuka mipaka na viwango ambao hakupewa kipindi yupo hai ! HAO NDIO BINADAMU na tabia zao. Ni tabia tu ya baadhi ya watu kubebea mabango mabaya ya Mtu au uzushi na kuacha mazuri yake then baadaye wakishikwa Uchawi wanageuza walichoamini Ni nyeusi kiwe nye.


Chadema Yakanusha kupoke barua ya bunge Inayowataka Wapeleke Majina ya Wagombea ubunge wa Afrika Mashariki (EALA).


Chama cha Demokrasia na Maendeleo kimesema kuwa hakijapokea barua yeyote kutoka bungeni ikiwataka kupeleka majina ya wagombea ubunge wa Afrika Mashariki (EALA).

Hayo yamesemwa na Mkuu wa Kitengo cha Habari, Elimu na Mawasiliano, Owen Mwandumbya, amesema kuwa chama cha Demokrasia na Maendeleo (Chadema) kinasubiri barua ya maelekezo kutoka bungeni lakini mpaka sasa hakijapokea.

Uchaguzi wa wabunge wa EALA uliingia dosari baada ya wagombea wa Chadema, Lawrence Masha na Ezekiah Wenje kupigiwa kura za hapana hivyo kukosa wawakilishi wa nafasi ya ubunge wa Afrika Mashariki.

Kwa upande wake Mkurugenzi wa Itifaki, Mawasiliano, Uenezi na Mambo ya Nje wa Chadema, John Mrema amesema kuwa mpaka sasa hawajapata barua kutoka kwa katibu wa bunge Dkt. Thomas Kashililah kuhusu hatua wanazopaswa kuchukua.

“Tangu umalizike uchaguzi wa awali hatujapata taarifa zozote kutoka Ofisi ya Bunge, tunasubiri barua kutoka kwa Katibu wa Bunge mchakato gani ufanyike ili suala hilo lifikie muafaka,”amesema Mrema.

Hata hivyo, Spika wa Bunge, Job Ndugai amesema kuwa kama Chadema watapeleka wagombea waliokataliwa basi wategemee majibu yale yale na kwamba atalazimika kutumia utaratibu mwingine.

‘Padri’ wa Kanisa Katoliki afunga ndoa Dar es Salaam


Miaka tisa baada ya kuvuliwa upadri wa Kanisa Katoliki, Privatus Kargendo jana alifunga ndoa na mchumba wake Rose Birusya. Ndoa hiyo ilifungwa katika Kanisa la Mtakatifu Petro jijini Dar es Salaam katika misa iliyoongozwa na Padri Stefano Kaombe.

Kabla ya kuvuliwa upadri, Karugendo alikuwa Padri wa Jimbo la Rulenge-Ngara kabla ya Papa Benedict XVI kumvua daraja hilo kwa madai ya kukiuka maadili ya kanisa katoliki.

Septemba 14, mwaka 2008 Karugendo alitangazwa kuwa ni muumini mlei asiye na daraja la upadri tena kupitia hati ya Papa yenye namba Protokali 4182/08.

Ingawa sababu za kuvuliwa kwake hazikuwekwa wazi kwa jamii zaidi ya kusema amekiuka kanuni za kanisa hilo, watu wengi walihusisha tukio hilo dhidi ya andiko lake kuhusu UKIMWI na matumizi ya mipira ya kiume (condoms).

Baada ya kuvuliwa cheo hicho, Karugendo sasa ni mchambuzi wa masuala ya kisiasa na kijamii katika vyombo mbalimbali vya habari ikiwemo gazeti la Mwananchi.

Waumini waliokuwamo katika misa ya ndoa hiyo, walimpongeza Karugendo na kusema kuwa uamuzi wake wa kufunga ndoa katika Kanisa Katoliki umeonyesha kuwa hana tatizo nalo licha ya kuvuliwa cheo hicho.

Mapadri wa Kanisa Katoliki hawaruhusi kuoa ikiaminika ili waweze kujikita zaidi katika kushughulikia masuala ya kanisa bila kuwa na kitu cha kuwaondoa humo ikiwa ni pamoja na familia.

TRA Yakamata Mali za Lugumi

Kampuni  ya udalali ya Yono, imefanikiwa kukamata mali za wafanyabiashara wanaodaiwa kodi ya serikali inayofikia zaidi ya Sh bilioni 68.1. Operesheni ya kukamata mali hizo kwenye maeneo mbalimbali ndani na nje ya Jiji la Dar es Salaam imefanywa ndani ya wiki moja.
 
Katika operesheni hizo maofisa wa Yono wamekuwa wakishirikiana na maofisa wa Mamlaka ya Mapato(TRA), ambayo ndiyo imeipa kampuni hiyo kazi ya kukusanya kodi kwenye maeneo mbalimbali nchini.
 
Kwa mujibu wa Mkurugenzi Mtendaji wa Kampuni ya Yono, Scholastica Kevela, Yono imepewa kazi na TRA kukusanya madeni yake ya kodi kwenye mikoa ya Dar es Salaam, Pwani Njombe, Mbeya, Iringa na Zanzibar.
 
Aliwataka watanzania kuunga mkono jitihada za Rais John Magufuli za kuleta maendeleo kwa kulipa kodi bila shuruti ili zipatikane fedha za kujenga miundombinu kama barabara, reli, shule, madaraja, hospitali na zahanati.
 
Kuhusu taarifa zilizozagaa kwenye mitandao ya kijamii kwamba hata baadhi ya mali za Kampuni ya Lugumi zimeshikiliwa, Mkurugenzi huyo alithibitisha kuwa habari hizo ni za kweli ambapo wanashikilia nyumba za kifahari za mfanyabiashara huyo.
 
“Mmeniuliza kwamba mmesikia nyumba za Lugumi zimefungiwa ni kweli, amefungiwa nyumba zake za kifahari na anadaiwa Sh bilioni 14, yupo mtu anaitwa Gm Dewji naye anadaiwa Sh bilioni 1.8, Kampuni ya ujenzi ya Mutluhan Construction anadaiwa Sh bilioni 45,” alisema.
 
Alisema wanaodaiwa wanapaswa kulipa madeni yao TRA ndani ya siku 14 na kwamba muda huo ukipita watapewa maelekezo na serikali kama ni kuuza mali hizo ili kufidia madeni yao.
 
Ofisa Mwandamizi wa TRA, ambaye hakupenda jina lake litajwe alithibitisha kwamba nyumba ya Lugumi iliyoko Upanga mtaa wa Mazengo inashikiliwa na mamlaka hiyo na ghorofa la kifahari lililoko Mbweni JKT, Dar es Salaam.
 
“Hakuna siri maana mkienda kwenye hizo nyumba mtakuta alama ambazo huwa Yono wanaweka kwa nyumba inayoshikiliwa, nendeni Upanga na kule Mbweni JKT mtakuta hizo nyumba tunazoshikilia,” alisema

Soma Habari Zilizo Katika Magazeti ya Leo Alhamisi ya April 27, 2017


Habari kwa kina bofya: HAPA

Kauli ya Waziri wa viwanda kuhusu Kenya Kupiga Marufuku Gesi ya Tanzania


Leo Waziri wa Viwanda na Biashara Charles Mwijage amekiri kupokea taarifa za katazo lililotolewa na serikali ya Kenya juu ya uuzwaji wa gesi zinazotumika majumbani zinazotoka Tanzania na kusema wataalamu wa wizara wanazifanyia kazi taarifa hizo.

Waziri Mwijage ametoa taarifa hiyo wakati alipozungumza na mwandishi wahabari wa Azam Two mjini Dodoma baada ya kuzagaa kwa taarifa za serikali ya kenya kupiga marufuku ya gesi zamajumbani za Tanzania kuuzwa Kenya na kukiri kuwa Kenya wamekuwa na chokochoko kadhaa lakini watahakikisha wanakaa chini kutafuta suluhu ikiwa ni pamoja na kuwashirikisha viongozi wa juu wa nchi hizi mbili.

==>Msikilize hapo chini akiongea


Wednesday, April 26, 2017

Kauli ya Diamond Baada ya Ray C Kutoka na Wimbo wa "Unanimaliza"

Baada ya Mwimbaji Ray C kuachia wimbo wake wa Unanimaliza, Leo Msanii wa BongoFleva, Diamond Platnumz kupitia account yake ya Instagram ameandika ujumbe huu

"Salaam dada angu @rayctanzania , siku ya leo nilitamani nikwambie maneno haya: Spirit ama juhudi unayoionyesha sasa inatia faraja sana, naamini sio kwa wapenda muziki wa Tanzania tu bali hata kwa watu mbalimbali….

"Nafarijika kuona wimbo wako wa #Unanimaliza watu mbalimbali wameupokea vizuri, na nisiwe mnafiki hata mie ni miongoni mwa watu wanaoupenda wimbo huu wako mpya…. Ombi langu kwako usikubali kurudi nyuma tena, ijapokuwa sanaa zetu zina changamoto nyingi ila amini ni mitihani tu ya Mwenyez Mungu, ila ukiwa mvumilivu na kumuomba Muumba, itapita….

"niwaombe pia Vyombo vya Habari vyetu pendwa tuzidi kumsapoti dada etu, kwani naami kwa sapoti yenu, sapoti ya wadau mbalimbali na kuongeza juhudi kwake kutamfanya awe mfano bora, na kuamsha vijana wengi sana mitaani kwetu ambao pengine walijikatia tamaa kwa mambo mbalimbali….InshaAllah Mwenyez Mungu akusmamaie katika kazi zako na Maisha ya kila siku🙏"


Advertisement

Marekani yaanza kujenga mtambo kuzuia makombora ya Korea Kaskazini

Korea Kusini imesema wanajeshi wa Marekani wameanza kujenga mtambo wa kisasa wa kuzuia makombora katika eneo moja kusini mwa nchi hiyo.

Mtambo huo wa kujilinda dhidi ya makombora, ambao hufahamika kitaalamu kama THAAD, kwa Kiingereza Terminal High Altitude Area Defense, kutokana na wasiwasi wa tishio kutoka kwa Korea Kaskazini ambayo imeendelea kufanyia majaribio makombora.

Wizara ya ulinzi ya Korea Kusini imesema mtambo huo utakamilishwa an utakuwa tayari kutumika katika kipindi cha mwaka mmoja.

Kumekuwepo na taarifa za kutokea kwa makabiliano kati ya wenyeji na polisi eneo panapojengwa mtambo huo, ambalo awali lilikuwa uwanja wa mchezo wa gofu.

Mtambo huo unajengwa katika wilaya ya Seongju

China imekuwa ikipinga kuwekwa kwa mtambo huo.

Rais wa Marekani Donald Trump ameashiria kwamba Marekani iko tayari kuchukua hatua kivyake bila kuishirikisha China kukabiliana na tishio la nyuklia kutoka kwa Korea Kaskazini.

THAAD ni nini?
  • Ni teknolojia ya kujilinda ya kutungua makombora ya masafa mafupi na wastani ambayo huyaharibu yanapokaribia kulipuka.
  • Hugonga kombora la kuliharibu
  • Ina uwezo wa kufika umbali wa kilomita 200 na inaweza kurushwa juu hadi kilomita 150 angani
  • Marekani imewahi kuweka mitambo kama hiyo Guam na Hawaii kujilinda dhidi ya uwezekano wa mashambulizi kutoka kwa Korea Kaskazini.
Chanzo: BBC

Kenya imepiga marufuku gesi ya kupikia ya Tanzania kuingizwa nchini humo.....Zitto Kabwe Aitaka Serikali Ichukue Hatua


Wizara ya Nishati ya Kenya imepiga marufuku gesi ya kupikia kutoka Tanzania kuingia nchini humo. Tamko la Katibu Mkuu wa Wizara ya Nishati ya Kenya linasema ‘ ndani ya siku 7 kuanzia juzi tarehe 24 Aprili 2017, itakuwa ni marufuku Kwa Kenya kuagiza Gesi ya kupikia kutoka Tanzania ‘.

Uamuzi huu wa Kenya ni kinyume na misingi ya Jumuiya ya Afrika Mashariki ambapo Tanzania na Kenya ni wanachama. Kwa mujibu wa Itifaki ya Soko la Pamoja, bidhaa za nchi zetu zinaruhusiwa kusambaa ndani ya jumuiya bila vikwazo.

Gesi ya kupikia kuingia Kenya hutokea Tanzania Kwa sababu Tanzania ni nchi pekee katika ukanda huu ambayo imewekeza mitambo ya kupokea Gesi na kuiweka kwenye mitungi. Bandari ya Dar Es salaam na mfumo mzuri zaidi wa kupokea gesi kuliko Bandari ya Mombasa na hivyo kuifanya gesi inayotoka Tanzania kuwa na gharama nafuu nchini Kenya kuliko gesi inayoagizwa kupitia bandari ya mombasa.

Uamuzi wa kuzuia Gesi kutoka Tanzania ni uamuzi wenye kulenga kuilinda bandari ya Mombasa Kwa kuvunja mkataba wa Jumuiya ya Afrika Mashariki na Kwa kutaka kuifanya Tanzania iendelee kuwa muuzaji wa malighafi kwenda Kenya badala ya bidhaa zilizokamili Kama gesi ya kupikia.

Uamuzi huu wa Serikali ya Kenya una lengo la kuathiri urari wa biashara kati ya Tanzania na Kenya ambapo Kwa miaka ya hivi karibuni Tanzania imekuwa ikiuza bidhaa nyingi zaidi huko Kenya kuliko inazoagiza kutoka nchi hiyo.

Ninamsihi Waziri wa Biashara na Viwanda wa Tanzania afuatilie suala hili na kuzungumza na mwenzake wa Kenya ili waondoe vikwazo Hivi vya biashara ambavyo havina maana yeyote na vinazuia raia wa kenya kupata bidhaa nafuu kutoka Tanzania. 

Viwanda vingi vya Kenya hutegemea malighafi kutoka Tanzania, kuzuia gesi ya kupikia na kuendelea kuagiza malighafi za kuendesha viwanda vyao ni sera ya Kenya kuifanya Tanzania kuwa chanzo cha malighafi tu na sio chanzo cha bidhaa zilizoongezwa thamani.

Serikali ya Tanzania isikubali hili na ianze mazungumzo mara moja na Serikali ya Kenya ili Watanzania wanaouza gesi ya kupikia huko Kenya waendelee kuuza na kutumia Bandari ya Dar Es Salaam. 

Kama Serikali ya Kenya ikiendelea na msimamo wake basi Tanzania ichukue msimamo kama huo Kwa bidhaa za Kenya Kama maziwa ambayo yamejaa kwenye soko letu.

Zitto Kabwe, Mb
Kigoma mjini
26/4/2017

Jukwaa la Wahariri (TEF) Lamkaa Koo Profesa Ibrahim Lipumba......Lamtaka Atoe Maelezo Sakata la CUF Kuvamiwa na Waandishi Kupigwa


Jukwaa la Wahariri nchini (TEF) limelaani kitendo cha waandishi wa habari kujeruhiwa katika tukio la uvamizi lililotokea katika mkutano wa CUF katika hotel ya Vina kata ya Mabibo ambapo waandishi wa habari walipigwa na kujeruhiwa

Katika taarifa hiyo ya (TEF) imemtaka Profesa Lipumba kujitokeza na kukiri na kuomba radhi kwa waandishi wa habari pamoja na Watanzania kufuatia tukio hilo kama alivyofanya Maalim Seif

"Tunamtaka Profesa Lipumba binafsi atoe kauli kuhusu tukio hili kama alivyofanya Maalim Seif ambaye binafsi aliandika barua rasmi kwa uongozi wa TEF akilaani kupigwa kwa waandishi wa habari na kutoa pole kwa wale waliomizwa na kupata mshtuko" Walisema viongozi wa TEF

Taarifa hiyo ya TEF ilikwenda mbali zaidi na kuwatahadharisha waandishi wa habari, wahariri kuwa wanapaswa kuwa makini pindi wanapokuwa wanaitwa na kundi hili la Lipumba kwa ajili ya kutoa habari zao 

Rais Magufuli: Atakayethubutu Kuuvunja Muungano Atavunjika Yeye


Rais wa Jamhuri ya Muungano wa Tanzania Mheshimiwa Dkt. John Pombe Magufuli, leo tarehe 26 April 2017, ameongoza maelfu ya Watanzania katika sherehe za miaka 53 ya Muungano wa Tanganyika na Zanzibar zilizofanyika katika Uwanja wa Jamhuri Mjini Dodoma.

Akizungumza mara baada ya kukagua gwaride la vikosi vya ulinzi na Usalama lililoandaliwa kwa heshma yake, Rais Magufuli amewahakikishia watanzania kuwa yeye na Rais wa Zanzibara Dkt. Ali Mohamed Shein wataendelea kuulinda Muungano kwa nguvu zao zote na kwamba atakayejaribu kuuvunja atavunjika yeye.

''Muungano ndio silaha yetu. Ni nguvu yetu. Mimi na mwenzangu Dkt. Shein tutaulinda Muungano  kwa nguvu zote. Yeyote atakayejaribu kuuvunja atavunjika yeye'' amesema Rais Magufuli.

Aidha Dkt. Magufuli amewataka watanzania kuendelea kudumisha amani iliyopo nchini kwani amani ndio chachu ya maendeleo yanayopatikana nchini.

Rais Magufuli amesema Tanzania imeweza kufikisha miaka 53 ya Muungano wa Tanganyika na Zanzibar kwa sababu ya amani iliyopo nchini iliyowezesha kupatikana mafanikio makubwa ikiwa ni pamoja na kuunganisha mataifa yetu mawili na kuuunda taifa moja lenye nguvu.

Aidha amesema Muungano wa Tanganyika na Zanzibar umewezesha kupatikana mafanikio makubwa katika nyanja za kiuchumi, kisiasa na kijamii.

Mhe. Rais ametaja mafanikio mengine yaliyopatikana kutokana na Muungano ni kukua kwa uchumi na kukabiliana na matatizo ya umasikini na ukosefu wa ajira,kuimarisha miundombinu ya usafiri wa anga, majini,reli  na nchi kavu.

Aidha Muungano umeimarisha na kuboresha upatikanaji wa huduma za jamii ikiwa ni pamoja na kuongezeka kwa idadi ya shule na hospitali pamoja na kukua kwa demokrasia nchini.

Kwa mara ya kwanaza katika historia ya Muungano wa Tanganyika na Zanzibar Maadhimisho ya Sherehe za Muungano zinafanyika mkoani Dodoma makao makuu ya Serikali ikiwa ni ishara tosha kuwa Serikali ya awamu ya tano inayoongozwa na chama cha Mapinduzi imedhamiria kwa dhati kuhakikisha makao makuuu ya Serikali yanakuwa Dodoma.

''Niwahahakikishie wana Dodoma na Watanzania kwa ujumla  kwamba Serikali sasa tumefika Dodoma na hatutarudi tena, na  kama tulivyoahidi mwaka 2020 Serikali yote itakuwa imehamia hapa'' amesema Rais magufuli.

Sherehe za miaka 53 ya Muungano zimehudhuriwa na viongozi mbalimbali ikiwa ni pamoja na wajane wa viongozi waasisi wa Muungano mke wa hayati Mwalimu Julius Nyere Mama Maria Nyerere na hayati Abeid Aman Karume, Mama Shadya Karume,Makamu wa Rais Mama Samia Suluhu Hassan, Waziri Mkuu Kassim Majaliwa, na viongozi wa chama na serikali.

Kauli mbiu ya Sherehe za Muungano mwaka huu ni ''Miaka 53 ya muungano,Tuuulinde na kuuimarisha, Tupige vita Dawa za Kulevya na Kufanya Kazi kwa Bidii''

Jaffar Haniu
Naibu Mkurugenzi wa Mawasiliano ya Rais, IKULU
Dodoma
26 Aprili, 2017

Kauli ya Nape Nnauye kuhusu CCM kwenye Sherehe za maadhimsho ya Muungano

Ikiwa leo Tanzania inatimiza miaka 53 toka Tanganyika na Zanzibar zilipoungana mwaka 1964 na kuunda nchi ya Tanzania Mbunge wa jimbo la Mtama, Mh Nape Nnauye amefunguka na kusema CCM ndiyo waasisi wa Muungano huo.

Mhe Nape Nnauye anakiri kuwa licha ya mapungufu ya hapa na pale katika chama chake hicho lakini bado kinabakia kuwa chama bora cha mfano barani Afrika, Nape Nnauye amesema hayo kupitia ukurasa wake wa Twitter

"CCM bado ni Chama bora cha mfano kwa Afrika! Ni imara na kina historia ndefu, nzuri iliyotukuka sana! Ndio waasisi wa Muungano Wetu, tuudumishe" alisisitiza Nape Nnauye


Halima Mdee Aomba Msamaha Kwa Kumtukana Spika Job Ndugai

Mbunge wa jimbo la Kawe kwa tiketi ya CHADEMA Mhe. Halima Mdee jana amefunguka na kuomba radhi bungeni kufuatia kutoa lugha isiyokuwa na staha bungeni wakati wa uchaguzi wa Wabunge wa Bunge la Afrika Mashariki uliofanyika April 4, 2017.

Halima Mdee wakati akiomba radhi hiyo anasema kuwa siku hiyo ya uchaguzi kulikuwa na matukio ambayo yalikuwa yakiendelea bungeni ambayo yalimpelekea kutoa lugha isiyokuwa sawa kitamaduni za bunge, ambayo ilimgusa Spika wa Bunge na Naibu waziri wa Wizara ya Afya, Maendeleo ya Jamii, Jinsia, Wazee na Watoto, Dkt. Khamis Kigwangala

"Mhe. Mwenyekiti tarehe 4 mwezi wa 4 wakati wa uchaguzi wa EALA kuna matukio ambayo yalikuwa yanaendelea yakanipelekea kuzungumza lugha ambayo kitamaduni za Bunge si sawa na lugha husika ilimgusa Spika wa bunge na Mhe, Kigwangala kwa namna moja au nyingine

"Kama mbunge mzoefu nilitumia jitihada binafsi kuzungumza na kuomba radhi wahusika katika 'individual capacity'lakini vilevile nikaona ni busara kwa sababu haya maneno niliyasema bungeni hivyo kuzungumza pia hapa na kumuomba radhi Mhe. Spika kwa hiyo niliomba huu muda kwa lengo la kumuomba radhi, kumwambia namuheshimu na kumwambia sitarudia" alisema Halima Mdee

Mbali na hilo Halima Mdee aliendelea kuomba radhi kwa wabunge, watanzania pamoja na wananchi wa jimbo la Kawe lakini pia Halima Mdee alisisitiza kuwa michango yake ya bunge itaendelea kama kawaida yake lakini kwa kutumia lugha za staa.  

Rais Magufuli atoa msamaha kwa wafungwa Katika Kuadhimisha miaka 53 ya Muungano

Katika kuadhimisha Miaka 53 ya Muungano wa Tanzania tarehe 26 Aprili, 2017 Mheshimiwa Rais wa Jamhuri ya Muungano wa Tanzania kwa kutumia madaraka aliyopewa chini ya Ibara ya 45(1)(d) ya Katiba ya Jamhuri ya Muungano wa Tanzania ametoa msamaha kwa wafungwa wafuatao:-

Wafungwa wote ambao baada ya punguzo la kawaida la moja ya tatu (1/3) linalotolewa chini ya Kifungu 49(1) cha Sheria ya Magereza Sura ya 58, wawe wametumikia nusu (½) ya vifungo vyao vilivyobaki, isipokuwa wafungwa walioorodheshwa katika Ibara ya 2(i – xxi).

Wafungwa wagonjwa wenye magonjwa kama UKIMWI, Kifua kikuu (TB) na Saratani (Cancer) ambao wako kwenye “terminal stage”. Wafungwa hawa wathibitishwe na Jopo la Waganga chini ya Uenyekiti wa Mganga Mkuu wa Mkoa/Mganga Mkuu wa Wilaya.

Wafungwa wazee wenye umri wa miaka sabini (70) au zaidi. Umri huo uthibitishwe na Jopo la Waganga chini ya Uenyekiti wa Mganga Mkuu wa Mkoa/Mganga Mkuu wa Wilaya.

Wafungwa wa kike walioingia na mimba gerezani, pamoja na wale walioingia na watoto wanaonyonya na wasionyonya.

Wafungwa wenye ulemavu wa mwili na akili (Physical disability and mental disability). Ulemavu huo uthibitishwe na Jopo la Waganga chini ya Uenyekiti wa Mganga Mkuu wa Mkoa/Mganga Mkuu wa Wilaya.

Aidha, Msamaha huu wa Mheshimiwa Rais hautawahusu wafungwa wafuatao:-

Wafungwa waliohukumiwa adhabu ya kunyongwa.
Wafungwa waliohukumiwa adhabu ya kunyongwa na adhabu hiyo kubadilishwa kuwa kifungo cha maisha au kifungo gerezani.

Wafungwa waliohukumiwa kifungo cha maisha gerezani.

Wafungwa wanaotumikia kifungo kwa makosa ya kujihusisha na usafirishaji na matumizi ya madawa ya kulevya kama vile cocaine, heroin, bhangik.

Wafungwa wanaotumikia kifungo kwa makosa ya kujihusisha na uombaji na upokeaji au utoaji rushwa.

Wafungwa wanaotumikia kifungo kwa makosa ya unyang’anyi na unyang’anyi wa kutumia silaha au kujaribu kutenda makosa hayo (robbery with violence, armed robbery and attempt robbery).

Wafungwa wanaotumikia kifungo kwa makosa ya kupatikana na silaha, risasi au milipuko isivyo halali (fire arms, ammunitions and explosives).

Wafungwa wanaotumikia kifungo kwa makosa ya shambulio la aibu, kunajisi, kubaka na kulawiti au kujaribu kutenda makosa hayo.

Wafungwa waliopatikana na hatia na kuhukumiwa kifungo kwa kosa la kuwapa mimba wanafunzi wa Shule za Msingi na Shule za Sekondari na ambao walitenda kosa hilo wakiwa na umri wa miaka kumi na nane (18) na kuendelea.

Wafungwa wanaotumikia kifungo kwa makosa ya wizi wa magari na pikipiki, uharibifu wa miundombinu au kujaribu kutenda makosa hayo.

Wafungwa wanaotumikia kifungo chini ya Sheria ya Bodi ya Parole (Act. No. 25/1994) na Sheria ya Huduma kwa Jamii (Act. No. 6/2002).

Wafungwa waliopatikana na hatia na kuhukumiwa kifungo kwa makosa ya kutumia vibaya madaraka yao.

Wafungwa waliowahi kupunguziwa kifungo na Msamaha wa Mhe. Rais na bado wangali wanaendelea kutumikia sehemu ya kifungo kilichobaki.

Wafungwa waliopatikana na hatia na kuhukumiwa kwa kosa la kuzuia watoto kupata masomo.

Wafungwa waliopatikana na hatia na kuhukumiwa kwa kosa la utekaji wa watoto, kupoka na kufanya biashara ya binadamu (Human Trafficking).

Wafungwa waliopatikana na hatia na kuhukumiwa kwa kosa la kukutwa na viungo vya binadamu.

Wafungwa wanaotumikia vifungo kwa makosa ya kujihusisha kwa namna yoyote ile na nyara za Serikali na ujangili (poachers).

Wafungwa wanaotumikia vifungo kwa makosa ya wizi/ubadhirifu wa fedha za Serikali.

Wafungwa wanaotumikia vifungo kwa makosa ya kutoroka au kujaribu kutoroka chini ya ulinzi halali.

Wafungwa walioingia gerezani baada ya tarehe 16/03/2017.

Wafungwa warejeaji wa makosa/wafungwa waliowahi kufungwa gerezani (Recidivists).

Wafungwa 2,219 watafaidika na msamaha huu na wataachiliwa huru. Ni mategemeo ya Serikali kwamba watarejea tena katika jamii kushirikiana na wenzao katika ujenzi wa Taifa na kwamba watajiepusha kutenda makosa ili wasirejee tena gerezani.

Meja Jenerali Projest Rwegasira
KATIBU MKUU
WIZARA YA MAMBO YA NDANI YA NCHI

26/04/2017