Kapingaz Blog

Thursday, February 2, 2017

Mbunge Ahoji Viongozi wa Kisiasa Kuvaa Sare za JWTZ


Mbunge wa Ukonga, Mwita Waitara (Chadema), amesema kitendo cha makatibu wakuu, wakuu wa mikoa na wilaya kuvaa sare za Jeshi la Wananchi Tanzania (JWTZ) wakati wa utekelezaji wa majukumu yao, ni kinyume na Katiba ya nchi na kwamba ni dalili ya nchi kuendeshwa kijeshi.

Tangu alipoapishwa Novemba 5 mwaka juzi, Rais John Magufuli amekuwa na utaratibu wa kuteua maofisa JWTZ katika nyadhifa mbalimbali jambo ambalo wabunge wa Upinzani wamekuwa wakilipinga mara kwa mara.

Waitara alitoa kauli hiyo bungeni jana wakati akiomba Mwongozo, baada ya kumalizika kwa kipindi cha maswali na majibu, akisisitiza kuwa wanajeshi hao kufanya shughuli za kisiasa si sawa.

Huku akitumia kanuni ya Bunge ya 68 (7) na kurejea taarifa ya habari ya Shirika la Utangazaji (TBC) alisema: “Wakati naangalia taarifa ya habari nikamwona Katibu Mkuu wa Wizara ya Maliasili na Utalii, Meja Milanzi (Meja Jenerali, Gaudence) akifanya shughuli zake huku amevaa kijeshi kinyume cha Ibara ya 147 ya Katiba yetu.”

Baada ya kikao cha Bunge kuahirishwa saa 7 mchana, Waitara alisema kuwa ni kawaida kwa wateule wa Rais kuvaa sare hizo na kusisitiza: “Wakuu wa mikoa ni wanasiasa na ndani ya CCM ni wajumbe wa kamati za siasa za mikoa. Mkuu wa Wilaya ni mjumbe wa kamati ya siasa ya wilaya, sasa wanaanzaje kuvaa au kujihusisha na mavazi ya kijeshi?”

Akiwa bungeni, Waitara alisisitiza kuwa siku za karibuni Mkuu wa Wilaya ya Kakonko, Kanali Hosea Ndaga naye alionekana akifanya shughuli zake huku amevaa sare hizo.

“Ukisoma Katiba pamoja na mambo mengine, inapiga marufuku wanajeshi kujihusisha na siasa. Hawa viongozi wanaovaa nguo za kijeshi wanawatisha wananchi wanapokwenda kusikiliza matatizo,” alisema.

Ibara ya 147 (3) inasema: “Itakuwa marufuku kwa mwanajeshi kujiunga na chama chochote cha siasa, isipokuwa tu kama atakuwa na haki ya kupiga kura iliyotajwa katika ibara ya 5 ya Katiba hii”.

Mbunge huyo alihoji: “Inakuwaje wengine wanavaa sare za Jeshi na vyeo juu wakati wamestaafu?”

Akijibu Mwongozo huo, Mwenyekiti wa Bunge, Najma Giga alisema kwa mujibu wa kanuni ambayo Mbunge huyo aliombea Mwongozo, hoja aliyotoa ni suala ambalo halijatokea ndani ya Bunge wakati likiendelea na shughuli zake, hivyo asingeweza kutoa majibu yoyote.

0 comments: